جموں، 24 جولائی (یو این آئی) جموں میں بین الاقوامی سرحد کے سچیت گڑھ سیکٹر میں ہفتے کو بارڈر سکیورٹی فورس اور پاکستانی رینجرز کے درمیان ہونے والی سیکٹر کمانڈر سطح کی میٹنگ کے دوران اولالذکر نے ڈرون سرگرمیوں میں اضافے پر آخرالذکر سے اپنا احتجاج درج کیا ہے۔
بی ایس ایف کے ایک ترجمان نے تفصیلات فراہم کرتے ہوئے کہا کہ پاکستانی رینجرز کی درخواست پر ہفتے کو سچیت گڑھ علاقے میں طرفین کے درمیان ایک سیکٹر کمانڈر سطح کی میٹنگ ہوئی۔
انہوں نے کہا: ‘میٹنگ کے دوران دونوں طرف کے کمانڈروں نے مختلف معاملات زیر بحث لائے۔ بی ایس ایف کا زور پاکستان کی ڈرون و دہشت گردانہ سرگرمیوں، سرنگوں کی کھدائی اور سرحدی انتظام سے متعلق دوسرے معاملات پر تھا’۔
بی ایس ایف کے ترجمان نے کہا کہ میٹنگ کے دوران جموں میں پاکستان کی ڈرون سرگرمیوں پر پاکستان سے ایک زوردار احتجاج درج کیا گیا ہے۔
انہوں نے مزید کہا کہ بی ایس ایف کے وفد کی قیادت ڈی آئی جی سرجیت سنگھ جبکہ پاکستانی رینجرز کے وفد کی قیادت سیکٹر کمانڈر بریگیڈیئرمراد حسین کر رہے تھے۔
یہ دونوں ممالک کے ڈی جی ایم اووز کی طرف سے جنگ بندی معاہدے پر عمل درآمد کرنے کے متفقہ فیصلے کے بعد بی ایس ایف اور رینجرز کے درمیان سیکٹر کمانڈر سطح کی پہلی میٹنگ تھی۔
بی ایس ایف ترجمان نے کہا کہ میٹنگ نہایت ہی خوشگوار، مثبت اور تعمیری ماحول میں منعقد ہوئی۔
ان کا مزید کہنا تھا: ‘دونوں طرف کی افواج نے بین الاقوامی سرحد پر امن اور اہم آہنگی کو قائم رکھنے پر رضا مندی ظاہر کی ہے’۔
یو این آئی