کپوارہ، 24 مئی جموں و پولیس نے شمالی کشمیر کے ضلع کپوارہ میں ایک نارکو ماڈیول کا پردہ فاش کر کے 8 کلو گرام ہیروئن، جس کی بین الاقوامی بازار میں قیمت قریب پچاس کروڑ روپے ہے، ضبط کرنے کا دعویٰ کیا ہے۔
ایس ایس پی کپوارہ ڈاکٹر جی وی سندیپ چکروتی نے پیر کو یہاں نامہ نگاروں کو تفصیلات فراہم کرتے ہوئے کہا: ‘کپوارہ پولیس نے گزشتہ شام ایک اور پاکستان سپانسرڈ ماڈیول کا پردہ فاش کیا۔ اس آپریشن کے دوران مدثر احمد لون نامی ایک جنگجو اعانت کار کو بھی گرفتار کیا گیا ہے۔ اس کے قبضے سے آٹھ کلو گرام ہیروئن برآمد کی گئی ہے جس کی قیمت پچاس کروڑ روپے کے قریب ہوگی’۔
انہوں نے کہا: ‘مدثر اور اس کا گروپ پاکستانی ہینڈلرس کے ساتھ رابطے میں ہے۔ یہ گروپ کشمیر میں دہشت گردوں کو مالی مدد فراہم کرنے کے لئے منشیات کے دھندے میں ملوث ہے۔ اس گروپ نے منشیات اور دہشت گردوں کے درمیان تعلق کو ایکسپوز کر دیا ہے۔ ان منشیات کی فروخت سے حاصل ہونے والے پیسے دہشت گردوں کو سپلائی کئے جاتے ہیں۔ یہ ایک بہت بڑا حوالہ ریکٹ ہے’۔
ایس ایس پی کپوارہ نے کہا کہ اس کیس کی تحقیقات کے لئے ایک خصوصی تحقیقاتی ٹیم تشکیل دی گئی ہے نیز کیس میں مزید گرفتاریاں متوقع ہیں۔
ان کا مزید کہنا تھا: ‘اس سال کپوارہ پولیس نے ایسے واقعات سے متعلق 32 مقدمے درج کئے ہیں۔ 40 سے 45 بڑے سمگلروں کو گرفتار کیا گیا ہے۔ اس سال اب تک 28 کلو گرام ہیروئن برآمد کی جا چکی ہے۔ اس کی قیمت 120 کروڑ روپے ہوگی’۔
قبل ازیں ایک پولیس ترجمان نے اپنے ایک بیان میں کہا کہ پولیس نے ایک مصدقہ اطلاع موصول ہونے پر کارروائی کرتے ہوئے ایک نارکو مڈیول کا پردہ فاش کر کے آٹھ کلو گرام منشیات جس کی قیمت قریب پچاس کروڑ روپے ہے، ضبط کی ہیں اور ایک جنگجو اعانت کار کو گرفتار بھی کیا ہے۔
گرفتار شدہ کی تصدیق مدثر احمد لون ساکن کیرن بالا کے بطور ہوئی ہے۔
انہوں نے کہا کہ اس ماڈیول میں ملوث دیگر افراد کی شناخت کی گئی ہے اور انہیں گرفتار کرنے کی کوششیں جا رہی ہیں۔
موصوف ترجمان نے بیان میں کہا کہ اس ماڈیول کا پاکستانی ہینڈلرس کے ساتھ رابطہ تھا اور یہ ماڈیول منشیات کے کاروبار کے علاوہ وادی میں جنگجوؤں کی مالی مدد کرنے میں ملوث تھا۔
انہوں نے کہا کہ یہ ماڈیول وادی میں جنگجویانہ سرگرمیوں کو فروغ دینے پر کام کر رہا تھا اور نوجوانوں کو جنگجوؤں کی صفوں میں شمولیت اختیار کرنے پر ورغلا رہا تھا۔
ان کا کہنا تھا کہ اس سلسلے میں پولیس اسٹیشن کرال پورہ میں ایک کیس درج کر کے مزید تحقیقات شروع کی گئی ہے۔
یو این آئی
National Flag of India Quiz Draws Strong Response; 9 Days Left to Participate
New Delhi, Aug 6 (JKNS): The Department of Youth Affairs, through MY Bharat, has called upon young citizens to participate...
Read more
