کرناہ،27 جولائی: سرحدی سب ڈویژن کرناہ کے عوام کے لیے ایک بڑی خوشخبری سامنے آئی ہے۔ جموں و کشمیر حکومت نے مالی سال 2026-27 کے کیپکس بجٹ کے تحت ٹاڈ کرناہ میں قاضی ناگ نالہ پر 50 میٹر اسپین اسٹیل ٹرس گرڈر پل کی تعمیر کے منصوبے کو باضابطہ منظوری دے دی ہے۔ اس منصوبے کو علاقے کی ایک دیرینہ ضرورت قرار دیا جا رہا ہے، جس سے ہزاروں لوگوں کو آمد و رفت میں نمایاں سہولت حاصل ہوگی۔
اس اہم پیش رفت پر ایم ایل اے کرناہ جاوید احمد مرچال نے اطمینان اور خوشی کا اظہار کرتے ہوئے کہا کہ یہ منظوری ان کی مسلسل کوششوں، عوامی مطالبات اور حکومت کے مثبت تعاون کا نتیجہ ہے۔ انہوں نے کہا کہ قاضی ناگ نالہ پر پل نہ ہونے کی وجہ سے مقامی آبادی برسوں سے مشکلات کا شکار تھی، خصوصاً بارشوں اور سیلابی صورتحال کے دوران لوگوں کو جان جوکھم میں ڈال کر نالہ عبور کرنا پڑتا تھا۔
جاوید احمد مرچال نے کہا کہ اس پل کی تعمیر سے ٹاڈ، پراڈہ، امروہی، ڈھنی، سدھپورہ سمیت کئی دیگر دیہات ایک دوسرے سے بہتر انداز میں جڑ جائیں گے، جس سے نہ صرف سفری سہولیات میں بہتری آئے گی بلکہ تعلیمی، طبی، تجارتی اور سماجی سرگرمیوں کو بھی فروغ ملے گا۔ انہوں نے کہا کہ یہ منصوبہ سرحدی علاقوں کی ترقی اور بنیادی ڈھانچے کو مضبوط بنانے کی جانب ایک اہم قدم ثابت ہوگا۔
ایم ایل اے نے اس منصوبے کی منظوری پر وزیر اعلیٰ جموں و کشمیر عمر عبداللہ اور نائب وزیر اعلیٰ سریندر کمار چودھری کا خصوصی شکریہ ادا کرتے ہوئے کہا کہ حکومت نے کرناہ کے عوام کی ایک اہم ضرورت کو پورا کرنے کی سمت میں مؤثر اقدام اٹھایا ہے۔ انہوں نے امید ظاہر کی کہ متعلقہ محکمے جلد از جلد منصوبے پر عملی کام شروع کریں گے تاکہ عوام کو اس کا فائدہ بروقت حاصل ہو سکے۔
مقامی لوگوں نے بھی اس فیصلے کا خیرمقدم کرتے ہوئے کہا کہ قاضی ناگ نالہ پر پل کی تعمیر ان کے برسوں پرانے مطالبے کی تکمیل ہے۔ ان کے مطابق اس منصوبے سے نہ صرف روزمرہ کی زندگی آسان ہوگی بلکہ پورے علاقے کی معاشی اور سماجی ترقی کو بھی نئی رفتار ملے گی۔
عوام نے امید ظاہر کی کہ حکومت اور متعلقہ ادارے منصوبے کو مقررہ مدت میں مکمل کریں گے تاکہ سرحدی علاقوں کے رہائشی محفوظ، آسان اور ہر موسم میں قابلِ اعتماد رابطہ سڑک کی سہولت سے مستفید ہو سکیں۔
