کپوارہ
کپواڑہ سے تقریباً پندرہ کلو میٹر دور واقع ملک محلہ پڑی پورہ سرکلی کے لوگ آج بھی صاف پینے کے پانی جیسی بنیادی سہولت سے محروم ہیں۔ مقامی آبادی نے احتجاج کرتے ہوئے بتایا کہ جدید دور میں بھی وہ قدیم زمانے جیسی مشکلات بھری زندگی گزارنے پر مجبور ہیں۔
مقامی لوگوں نے اپنے احتجاج کے دوران میر محمد فیاض اور ضلع انتظامیہ سے مطالبہ کیا کہ علاقے کے عوام کے ساتھ انصاف کرتے ہوئے انہیں صاف پینے کے پانی کی سہولت فوری طور فراہم کی جائے۔ مظاہرین کا کہنا تھا کہ انتخابی مہم کے دوران عوام سے وعدے کئے گئے تھے کہ علاقے میں پینے کے صاف پانی کا انتظام کیا جائے گا، تاہم آج تک یہ وعدے عملی شکل اختیار نہ کرسکے۔
احتجاج میں شامل لوگوں نے بتایا کہ انہیں روزانہ سخت مشکلات کا سامنا کرنا پڑتا ہے اور کئی مرتبہ دور دراز مقامات سے پانی لانا پڑتا ہے۔ انہوں نے حکومت اور متعلقہ محکمہ سے اپیل کی کہ عوامی مسائل کو سنجیدگی سے لیتے ہوئے ملک محلہ پڑیپورہ سرکلی میں صاف پینے کے پانی کی فوری فراہمی یقینی بنائی جائے تاکہ لوگوں کی مشکلات کا ازالہ ہوسکے۔
