پیرزادہ سعید
کرناہ // کرناہ کی سیاسی اور سماجی تنظیموں نے701-NH شاہراہ کی تعمیر کے دوران زد میں آنے والی بستوں اور بازاروں کو ہٹانے پر سرکار سے ایک بار پھر غور کرنے کی اپیل کی ہے ۔پچھلے کچھ دنوں سے کرناہ میں اس معاملے پر لوگ سراپا احتجاج ہیں اور تمام طبقہ فکر ہائے کے لوگوں نے حکام سے مطالبہ کیا ہے، کہ وہ اس پر غور کریں کیونکہ علاقے کی جغرفیائی حالت دوسرے علاقوں سے بلکل مختلف ہے اور یہاں کے لوگوں کے پاس اتنی زمین نہیں ہے کہ وہ پھر سے مکان تعمیر کر سکیں اور اپنا کاروبار شروع کر سکیں ۔معلوم رہے کہ رفیع آباد ، چھمکوٹ کرناہ شاہراہ کی تعمیر کے حوالے سے حالیہ سروے کی گئی ہے ،اور سڑک کو کشادہ کرنے کے دوران متعدد بستیاں اور بازار بھی اس سڑک کی زد میں آرہے ہیں ۔سابق ایم ایل اے کرناہ اور اپنی پارٹی کے ضلع صدر ایڈوکیٹ راجہ منظور نے سرکار اور ضلع انتظامیہ سے مطالبہ کیا ہے کہ لوگوں کو بے گھر کرنے کے بجائے ایسا منصوبہ تیار کریں تاکہ سڑک بھی تعمیر ہو اور لوگوں کا نقصان بھی کم ہو ۔راجہ منظور نے حکام سے مطالبہ کیا ہے کہ وہ اس سروے پر دوبارہ غور کریں ۔انہوں نے سرکار کو تجویز پیش کی ہے کہ سڑک کی تعمیر ایسے علاقوں سے کی جائے ،جہاں بستیاں کم ہیں ۔بیوپار منڈل کے صدر حاجی تسلیم احمد میر نے کہا کہ کرناہ میں برسوں بعد کاروبار پھولنے پھلنے لگا تھا اور یہاں بازار بن گئے تھے، لیکن سڑک کی سروے سے لگ رہا ہے کہ کرناہ میں بہت سارے بازار ایسے ہیں جو اس کی زد میں آرہے ہیں ۔انہوں نے کہا کہ سڑک کو کشادہ کرنے کا فیصلہ اچھا ہے اور ہم سرکار کے فیصلے کے حق میں ہیں ،لیکن سرکار کو پہلے اس تنگ اور کم رقبہ والے علاقے کی پوزیشن کو دیکھتے ہوئے اس کی سروے کرنی ہو گی، تاکہ لوگوں کا نقصان نہ ہو ۔حاجی تسلیم نے کہا کہ سرکار کو پہلے دکانداروں کےلئے کوئی نہ کوئی بندوبست کرنا ہو گا۔انہوں نے کہا کہ ہم نے دیکھا ہے کہ جب بھی کوئی پالیسی یا منصوبہ بنایا جاتا ہے تو اس وقت لوگوں کا خیال رکھا جاتا ہے اور ہم چاہتے ہیں کہ لوگوں کا خاص خیال رکھا جائے اور ساتھ میں جو دکاندار متاثر ہوں اُن کےلئے الگ جگہ اور دکانیں تعمیر کی جائیں تاکہ ان کا کاروبار متاثر نہ ہو،کیونکہ اکثر ہم نے دیکھا ہے کہ جہاں کہیں بھی بازار سڑکوں یا پھر دیگر منصوبوں کی زد میں آتے ہیں، تو وہاں کے تاجروں کےلئے سرکار الگ کمپلیکس تعمیر کرتی ہے ۔ سیول سوسائٹی کرناہ نے بھی اس معاملے پر سخت تشویش کا اظہار کیا ہے ۔سوسائٹی کے جنرل سکریٹری راجہ وقار خان نے کہا کہ سڑکیں وقت کی اہم ضرورت ہیں اور اس کی ضرورت بھی ہے لیکن اس کےلئے ایسی پالیسی ترتیب دی جائے جس سے لوگوں کا کم سے کم نقصان ہو ۔
