کرناہ // کرناہ میں حالیہ برف باری کے بعد متاثر ہوئی بجلی سپلائی بحال کر دی گئی ہے، البتہ کرناہ کپواڑہ شاہراہ سمیت دیگر کئی اندروانی سڑکوں سے بڑف ہٹانے میں انتظامیہ کو دشواریاں پیش آرہی ہیں ۔حالیہ برف باری کی وجہ سے 33کے وی بجلی کی ترسیلی لائن جو سادھنا ٹاپ سے ہو کر کرناہ پہنچتی ہے ،کو نقصان پہنچا تھا اور کئی ایک جگہوں پر بجلی کی ترسیلی لائنیں اور کھمبے زمین پر پڑے تھے ۔تاہم کشمیر پاور ڈیولپمنٹ کارپوریشن کے ملازمین نے ایک بار پھر 11ہزار فٹ بلندی پر واقعہ نستہ چھن گلی جہاں اس وقت 8فٹ کے قریب برف جمع ہے سے بجلی کی ترسیلی لائنوں کی مرمت کر کے کرناہ کو بجلی سپلائی بحال کی۔یاد رہے کہ سادھنا ٹاپ پر بھاری برف باری ہوتی ہے اور یہاں اکثر وبیشتر بجلی کی ترسیلی لائنیں زمین پر گر جاتی ہیں اور پھر علاقہ بجلی سے محروم ہو جاتا ہے لیکن گذشتہ 2 برسوں سے جس طرح محکمہ کے عارضی ملازمین نے کام کیا اس کی سرہنا ہر طرف سے ہو رہی ہے ۔ادھر بھاری برف باری کی وجہ سے بند ہوئی کرناہ کپواڑہ شاہراہ کو بحال کرنے کی کوششیں انتظامیہ کی طرف سے جاری ہیں، البتہ 8فٹ برف میں محکمہ بیکن کو کام کرنے میں دشواریاں پیش آرہی ہیںاس وقت کرناہ کے بہت سے لوگ کپواڑہ میں درماندہ ہیں جبکہ دلدار کے ایک باشندے کی لاش بھی کپواڑہ میں ہے اور لواحقین انتظامیہ سے مطالبہ کر رہے ہیں کہ اس کی میت کو کرناہ پہنچانے کےلئے اقدام کئے جائیں ،دلدار کرناہ کا یہ شہری گذشتہ رات سرینگر میں انتقال کر گیا ہے اور اس کو تدفین کےلئے کرناہ پہنچانے میں رکاوٹیں پیش آرہی ہیں ۔ادھر کرناہ کی کئی ایک اندروانی سڑکیں بھی برف سے ڈھکی ہوئی ہیں ۔کرناہ انتظامیہ نے اگرچہ سوموار کو ہی برستی برف میں کئی ایک اہم شاہراﺅں سے برف ہٹائی ،البتہ شمس پورہ ، بڑون ، جاڈہ اور دیگر دور افتادہ علاقوں کی سڑکیں ابھی بھی برف سے ڈھکی ہوئی ہیں،مقامی لوگوں نے انتظامیہ سے مانگ کی ہے کہ ان سڑکوں سے برف ہٹا کر لوگوں کی مشکلات کا ازلہ کیا جائے ۔اس دوران انتظامیہ نے اپنی ایک ایڈوائزی میں کہا ہے کہ علاقے میں بھاری برفباری ہوئی ہے، اس لئے لوگوں سے کہا جاتا ہے کہ وہ بالائی اور انچائی والے علاقوں کا سفر کرنے سے پرہیز کریں کیونکہ ان علاقوں میں پسیاں اور پتھر گر آنے کا عمل شروع ہو جاتا ہے ۔انتظامیہ کے ایک اعلیٰ افسر نے بتایا کہ علاقے میں بجلی سپلائی کو بحال کر دیا گیا ہے اور بیشتر اہم اور اندروانی سڑکوں سے بھی برف ہٹائی جا چکی ہے ۔انہوں نے کہا کہ مرحلہ وار طریقے سے تمام دیہات کو تحصیلدار ہیڈکواٹر کے ساتھ جوڑا جائے گا ۔افسر نے کہا کہ کرناہ کپواڑہ شاہراہ کی بحالی پر بھی محکمہ بیکن سے بات چیت چل رہی ہے اور ضلع ڈیولپمنٹ کمشنر کپواڑہ نے افسران کو ہدایت جاری کی ہیں کہ کسی بھی علاقے میں لوگوں کو پریشان نہیں ہونے دیا جائے ۔
