پیر زادہ سعید
کرناہ //برف باری کی وجہ سے بند ہوئی کرناہ کپوارہ شاہراہ کو بدھ کے روز گاڑیوں کی آمد ورفت کےلئے کھول دیا گیا ،جس کے بعد 2افراد کی نعشوں سمیت سینکڑوں افرادکپواڑہ سے کرناہ پہنچے ۔اس دوران علاقے میں کئی سڑکیں بند ہیں اور ان علاقوں کے لوگوں کو مشکلات کا سامنا ہے ۔بدھ کو موسم صاف ہونے کے بعد بیکن حکام نے شاہراہ کی بحالی کا کام شروع کیا اور شام دیر سے کپوارہ سے کرناہ کےلئے درماندہ گاڑیوں کو چلنے کی اجازت دی گئی ،ان گاڑیوں میں سینکڑوں مسافر بھی موجود تھے، کو کام کے سلسلے میں سرینگر آئے تھے ،جبکہ ان دو افراد کی نعشوں کو کرناہ پہنچایا گیا جو وادی کے ہسپتالوں میں لقمہ اجل بن گئے تھے، اور اُن کی نعشیں ہندوارہ کے مردہ گھر میں تھی، جبکہ کرناہ کی دو باراتیں بھی چوکی بل میں سڑک کھلنے کے انتظار میں تھی ۔بیکن حکام کے مطابق شاہراہ پر متعدد مقامات پر پسیاں اور پتھر گر آنے کے ساتھ ساتھ کئی جگہوں پر برفانی تودو ں کے گرنے کا بھی خطرہ لاحق تھا،لیکن اس کے باوجود شاہراہ کی بحالی کا کام انجام دے کر درماندہ گاڑیوں کو چلنے کی اجازت دی گئی ۔معلوم رہے کہ حالیہ بارشوں کے نتیجے میں کرناہ کے متعدد یہات کی سڑکیں ڈھ گئی تھیں، جبکہ بیسوں مکانوں کو بھی نقصان ہوا تھا لیکن ابھی بھی ایسی بستیاں ہیں جن کے رابطے منقطع ہیں ،جس سے انہیں مشکلات کا سامنا ہے ۔جاڈہ کرناہ کے لوگوں نے بتایا کہ کنڈی جاڈہ سڑک پر پسیاں گرنے سے اس کو نقصان ہوا ہے۔جاڈہ کے لوگوں کے مطابق علاقے میں ایسے بیمار بھی ہیں، جنہیں ٹنگڈار سب ضلع ہسپتال پہنچانا ضروری ہے،لیکن سڑک بند ہونے سے انہیں وہاں تک نہیں پہنچایا جا سکتا ہے، جبکہ جبڑی کے لوگ بھی سڑک کے بند ہونے سے پریشان ہیں ۔اسی طرح گھنڈی گجران ، درگڑ اور دیگر علاقے بھی تحصیل صدر مقامات سے کٹ کر رہ گئے ہیں ۔ادھر بدھ کو ایس ڈی ایم کرناہ ظفر احمد لون نے ایک پریس کانفرنس کے دوران بتایا کہ کرناہ میں سیلاب کا اگرچہ کوئی خطرہ نہیں تھا، البتہ ، جگہ جگہ لینڈ سلائڈنگ اور زمین کے کٹاﺅ سے نقصان ہوا ۔انہوں نے کہا کہ گھنڈی گجراں میں کچھ مکانوں اور ایک مسجد کو نقصان پہنچا اور وہاں سے لوگوں کو دوسرےمحفوظ جگہوں پر منتقل کیا اور لوگوں سے کہا گیا کہ وہ وہاں مسجد میں نماز ادا نہ کریں۔انہوں نے کہا کہ گھنڈی کے لوگوں کو اب درگڑ سے وہاں جانے کی اجازت دی جائے گی ،جس کی بحالی کا کام شروع ہو چکا ہے ، ایس ڈی ایم نے کہا کہ یہ اللہ کا کرم ہے کہ شدید بارشوں سے علاقے میں کوئی جانی نقصان بھی نہیں ہوا ۔انہوں نے کہا کہ چوکی بل کپواڑہ سڑک کو بھی آج چوکی بل سے کرناہ کےلئے کھول دیا اور ہماری کوشش ہے کہ کرناہ سے بھی کپواڑہ کےلئےگاڑیوں کو روانہ کیا جائے ۔ظفر لون نے کہا سڑکوں کی بحالی کےلئے بڑے پیمانے پر اپریشن شروع کیا گیا ہے جس کےلئے آر اینڈ بی ، پی ایم جی ایس وائی اور دیگر تمام ایجنسیوں کو کام پر بھی لگایا گیا ہے اور جہاں کہیں بھی لوگوں کو پریشانی ہو گی، اس کا ازالہ کیا جائے گا ۔
