کپواڑہ//بٹ مظفر
ڈپٹی کمشنر (ڈی سی) کپواڑہ، خالد جہانگیر نے سب ڈسٹرکٹ ہسپتال (ایس ڈی ایچ) کپواڑہ کا دورہ کیا اور وہاں مریضوں کو فراہم کی جارہی صحت کی سہولیات کا جائزہ لیا۔ انہوں نے ہسپتال میں 11 مئی سے شروع ہونے والے میگا ہیلتھ کیمپ کے ہموار انعقاد کی تیاریوں کا بھی جائزہ لیا جو 18 مئی تک جاری رہے گا۔
ڈپٹی کمشنر نے او پی ڈی، آئی پی ڈی، آپریشن تھیٹر اور گائناکالوجیکل سیکشن سمیت مختلف وارڈز کا معائنہ کیا، اس دوران انہوں نے میڈیکل سپرنٹنڈنٹ (ایم ایس)، ڈاکٹرز، پیرا میڈیکس اور مریضوں سے بات چیت کی اور سہولیات کے حوالے سے رائے لی۔ انہوں نے میڈیکل سپرنٹنڈنٹ پر زور دیا کہ وہ سہولیات کو مزید اپ گریڈ کریں تاکہ مریضوں کو علاج کے دوران کسی قسم کی تکلیف کا سامنا نہ کرنا پڑے۔ انہوں نے انہیں ہدایت دی کہ وہ سرحدی ضلع کپواڑہ کے مریضوں کو چوبیس گھنٹے دستیاب سہولیات فراہم کریں۔
جاری میگا ہیلتھ کیمپ کی تیاریوں کا جائزہ لیتے ہوئے ڈپٹی کمشنر کو بتایا گیا کہ کیمپ کے انعقاد کے لیے تمام ممکنہ اقدامات کیے گئے ہیں۔ انہیں بتایا گیا کہ محکمہ صحت، ڈویژنل انتظامیہ اور روٹری انٹرنیشنل (این جی او) نے مشترکہ طور پر ضلع کپواڑہ کے عام لوگوں کے لیے میگا ہیلتھ کیمپ کا انعقاد کیا ہے۔ انہیں مزید بتایا گیا کہ کیمپ کے پہلے دن 54 سرجریز کی گئیں جن میں 26 چشم، 14 گائنی اور 14 جنرل سرجری شامل ہیں۔
اس موقع پر ڈپٹی کمشنر نے خطاب کرتے ہوئے کہا کہ صحت کا شعبہ حکومت کی اولین ترجیحات میں شامل ہے اور ضلعی انتظامیہ ضلع میں صحت کی سہولیات کو بڑھانے کے لیے ہر ممکن تعاون فراہم کرنے کے لیے پرعزم ہے۔
